Rhoi proses achub pysgod ar waith

Mae’r safon hon yn ymwneud â rhoi proses achub pysgod ar waith i dynnu pysgod rhag perygl. Mae hyn fel arfer yn cael ei gyflawni trwy ddefnyddio cyfuniad o electrobysgota a rhwydo i ddal a symud pysgod yn ddiogel. Ar ôl dal y pysgod, cânt eu cadw dros dro ac wedyn eu trosglwyddo i leoliad cytunedig.

Mae’r safon hefyd yn cynnwys sefydlu’r ardal bysgota a pharatoi’r cyfarpar electrobysgota ynghyd â’r rhwydi a’r unedau cadw a ddefnyddir i gadw a throsglwyddo pysgod byw.

Weithiau, mae angen gostwng lefelau dŵr i gynorthwyo ag achub pysgod.

Mae’r safon hon yn gofyn eich bod yn gwneud gwaith yn ddiogel, yn unol â gofynion cyfreithiol a gofynion iechyd a diogelwch perthnasol, a’ch bod yn gweithio i gynnal bioddiogelwch a lleihau tarfu amgylcheddol bob amser.

Bydd y ddeddfwriaeth berthnasol sy’n rheoli cymhwyso’r safon hon yn amrywio yn ôl lleoliad y bysgodfa – yng Nghymru, Lloegr, yr Alban neu Ogledd Iwerddon.

1. cyflawni’r holl weithgareddau sy’n ofynnol i roi proses achub pysgod ar waith yn ddiogel yn unol â gofynion iechyd a diogelwch perthnasol
2. dewis a defnyddio cyfarpar diogelu personol (PPE) priodol ar gyfer y gwaith
3. egluro’r gofynion ar gyfer y broses achub pysgod
4. asesu amodau’r dŵr (h.y. gwelededd, llif y dŵr, dyfnder) i bennu’r dulliau dal pysgod mwyaf priodol i’w defnyddio
5. paratoi a chynnal a chadw’r cyfarpar dal pysgod i’r safon ofynnol
6. paratoi’r ardal bysgota i hwyluso achub pysgod a lleihau faint o bysgod sy’n dianc
7. paratoi unedau cadw pysgod addas i dderbyn a chynnal cyflwr y pysgod sydd wedi’u dal, gan gynnwys darparu awyru, lle bo gofyn
8. cynnal asesiad risg i bennu a yw’n ddiogel electrobysgota
9. cadarnhau bod y trwyddedau/hawlenni perthnasol ar gyfer electrobysgota yn eu lle cyn dechrau’r gweithgaredd
10. defnyddio cyfarpar dal pysgod yn ddiogel i ddal y pysgod, ond peidio â’u niweidio
11. trin pysgod wedi’u dal mewn modd sy’n lleihau straen
12. sefydlu’r pysgod yn ddiogel mewn unedau cadw pysgod
13. monitro ac arsylwi’r pysgod a rhoi gwybod am arwyddion o straen, trafferth neu abnormaledd i’r person priodol
14. cynnal cyfathrebu effeithiol gyda phawb sy’n ymwneud â’r broses achub pysgod
15. rhoi gwybod am unrhyw broblemau gyda’r broses cadw pysgod i’r person priodol
16. sterileiddio a storio cyfarpar dal pysgod ar ôl ei ddefnyddio, yn unol â gofynion y bysgodfa a gofynion cyfreithiol
17. cynnal lefelau addas o fioddiogelwch wrth ddal pysgod

1. y gofynion iechyd a diogelwch perthnasol sy’n gysylltiedig ag achub pysgod a defnyddio electrobysgota
2. pwysigrwydd defnyddio’r cyfarpar diogelu personol (PPE) cywir
3. y dulliau dal pysgod cyfreithiol perthnasol a’r gwahanol sefyllfaoedd pan y gellir eu defnyddio
4. sut i bennu’r dull mwyaf priodol o ddal pysgod ar gyfer y pysgod sy’n cael eu hachub ac amodau’r dŵr
5. sut i baratoi a chynnal a chadw cyfarpar priodol ar gyfer dal pysgod mewn cyflwr gweithredu diogel
6. sut dylai’r ardal gael ei pharatoi er mwyn hwyluso’r broses o achub pysgod a lleihau nifer y pysgod sy’n dianc
7. sut i ddewis a pharatoi unedau cadw addas
8. sut i gynnal asesiad risg i bennu a yw’n ddiogel defnyddio electrobysgota i ddal pysgod
9. y trwyddedau/hawlenni cywir sy’n ofynnol i gyflawni electrobysgota
10. pam mae gallu gweld yr holl bobl sy’n ymwneud â’r gweithgaredd electrobysgota yn bwysig i’r broses electrobysgota
11. dargludedd dŵr a’i bwysigrwydd i osod a defnyddio cyfarpar electrobysgota yn effeithiol
12. pam mae’n bwysig tynnu pysgod yn gyflym o’r maes trydan wrth ddefnyddio electrobysgota
13. sut a phryd y gall cyfarpar dal pysgod niweidio pysgod
14. sut i drin pysgod sydd wedi cael eu dal a’u sefydlu’n ddiogel yn yr unedau cadw
15. pryd mae angen awyru unedau cadw a sut gellir ei ddarparu
16. sut i adnabod arwyddion straen, trafferth neu abnormaledd mewn pysgod wedi’u dal
17. pwysigrwydd cynnal cyfathrebu yn ystod proses achub pysgod a’r ffordd orau o wneud hyn
18. pwysigrwydd bioddiogelwch a’i rôl o ran lleihau risgiau yn ystod proses achub ac adleoli pysgod